Баху Мухидинова: "«Бац1ги циги багъана, цараца би ч1ч1ик1ана…»" (статья на аварском языке)

О рубрике "КАВКАЗ"


Баху Мухидинова: "«Бац1ги циги багъана, цараца би ч1ч1ик1ана…»" (статья на аварском языке)
03.03.2017

Баху Мухидинова: "«Бац1ги циги багъана, цараца би ч1ч1ик1ана…»" (статья на аварском языке)






"Сегодня в школах учителя и ученики поставлены в такие условия, что невозможно ни учиться, ни учить. А родители вынуждены дополнительно финансировать обучение своих детей. Кому это выгодно?"


Баху Мухидинова


           *   *   *   *   *

Ун йик1ана собраниялде. Г1адатияб шагьаралда, г1адатияб ошколалда, г1адатияб эбел-инсулгун собрание.

Гьеб г1адатияб собраниялда г1адатияб гуреб ах1вал-х1ал бук1ана дир, рагъул фронталдеги ккун. «Бац1азулги циязулги» кор боркьараб рагъулъ, цонигиязе щиб бокьун бугебалиги бич1ч1уларого, г1иц1го жиндирго бет1ер ц1униялъул мурадалда, цин «бац1азухъе» векерун, цин «циязухъе» к1анц1ун вугев рагъухъанасда релъун йик1ана.


Циязул рахъ

Цин, иргадал рач1ун, учительзабаз лъималазде гьабуна гьужум. Ц1алдолел гьеч1ила, г1енеккулел гьеч1ила, сундениги гъира гьеч1ила ц1алдохъабазулилан.

Эбел-инсул рахъ ц1акъ сабруялда, абу-абурабги х1ехьон, г1енеккун ч1ана. Азда т1асан яхъун к1алъазе рекъон бук1инарилан юц1ц1ун ч1аниги, дир рак1 бук1ана ах1т1елеб «валлагь ц1алдезеги ц1алдолаан, г1енеккизеги г1енеккулаан, гъира ккелеб х1алалъ нужеца дарс кьолеб бук1арабани», - ян.  Интерес гьеч1еб жо, г1одор реч1ч1ун нилъ хваниги, гьабуларо нилъер лъималаз. Нилъецаги гьабуларо. Бокьун гьабураби, бокьич1ого гьабурабги х1алт1ул х1асилалги бат1и-бат1иял рук1уна. Лъималазул интерес бижиледухъ, ай, гъира баледухъ дарс кьезе лъай буго аслияб къаг1идаялда учителасда лъазе кколеб жо. Лъималазул ц1ализе гъира гьеч1олъи лъималазул г1айиб гуро! 

Цойги нухалъ гьари буго учительзабазде, нуж ч1ах1иялги ругелъул, г1акъилалги ругелъул, те гьеб цонигиял рергьунареб рагъ ц1алдохъабигун. Берцинлъиялдалъун, лъик1аб раг1удалъун бате гьезул рек1елъе нух. Нилъеда лъала киг1ан бокьаниги х1ужжаби, учител берцинвихьун, гьесул дарс берцинбихьун, жиндирго г1умрудул нух, г1умруялъ гьабизе махщел т1аса бищарал ц1алдохъаби лъугьаралги.


Бац1азул рахъ

Гьединан т1убанго цидуказул рахъалда, ай лъималазул рахъалда йик1арай дун, хиса-басун бац1азул рахъалда ятана, дагьайги гьазухъ г1енеккигун.

Гьаб школалъул цо анц1абилеб классалда раг1ула 34!!! ц1алдохъан!  45 минуталъ 34 ц1алдохъанасе учителас кьезе кколеб буго лъайги, тарбияги: малъараб лъан бугищалиги, цебе аралъул такрарги, ц1ияб бич1ч1изабиги, гьелъие к1алзул, берзул, кверзул алаталги, ай ц1иц1иял технологиялги х1алт1изарун, жив-жив ц1алдохъанасул хаслъиги х1исабалде босун, гьезул гъира базабулеб, интерес кколеб х1алалъ, дарс! Гьеб бажарулеб жойищ? Гуро! Бажаруларо! Гьеб бажарулареб жо гьабизе т1амун руго х1укуматалъ учительзаби. Щай?

Щай, гьадинги дагьал гурони хут1ун гьеч1ел анц1абилеб классалъул ц1алдохъабазул, анц1ила щугоялдаса т1аде чи гьеч1ев классал гьаризе бегьуларел? Лъеберго-к1икъого чиги жаниве гъун, аб х1укуматалъул ошколищ яги г1иял къайийищ? Нуж гурищ ругел ЕГЭйилан керен бухулел, щай гьелъие х1адуризе шарт1ал ч1езе гьаруларел? Яги, лъай кьунги босунги бажарулареб х1ал ошколаздаги гьабун, репетиторазухъе лъимал хьвадизарийищ нужер мурад?
Ошколалда бук1ине кколеб х1алалъ лъай щвезе рес бук1арабани, к1алалъ абураб жоги кьун, лъимал репетиторазухъе рит1изе ккелароан эбел-инсуцаги.

Х1исаб гьабураб мехалъ «бац1алги циялги» рагъизеги т1амун, «ЦЕР» буго парахат би ч1ч1ик1улеб.

Гьаб дир «ЩАЙ?» - илан абураб суалалъе жаваб бугев чи ватани, ц1акъ бокьилаан гьеб раг1изе.

Амма гьаб рагъулъ, эбел-эмен кканаха реч1ч1улел г1ачилъун.


__________________________________

Баху Мух1идинова

← Назад к списку новостей

  
ВКонтакт Facebook Одноклассники Twitter Яндекс Livejournal Liveinternet Mail.Ru