Баху Мухидинова: "«Тухум» цоял…" (статья на аварском языке)

О   рубрике   "ДАГЕСТАН"


Баху Мухидинова: "«Тухум» цоял…" (статья на аварском языке)
01.03.2017

Баху Мухидинова: "«Тухум» цоял…" (статья на аварском языке)

Зона комфорта. Каждый, попадая на руководящую должность, делает все, чтоб как можно дольше сохранить себя в этой зоне. Отсюда и все метаморфозы.

Баху Мухидинова


             _____________



Саламатал гIадинал чагIи рукIуна гьал гIадамал… хIакимлъи щвезегIан.

Гьабулеб бицунеб жоялдаги нур букIуна, битIараб-тIекъабги бичIчIулеб гIадин букIуна, гьереси-рекIкIги нилъедаго гIадин рихун букIуна, рищватчагIиги чIвазегIанги рокьуларо…   Бадиреги ралагьун, ракI рагьараб хабарги бицун бажарула.

Нужер иш лъаларо, дида жеги дандчIвачIо жиндирго ракIалда бугеб жо гIадамазда бицине кагъатги цебе ккун вахъунев гIадатияв чи. РакIалда бугеб жо бицине кагъат щибизеха? Кагъат къваригIуна ракIалдаго гьечIел жал рицун гIадамал гуккизе цере рахъунел хIакимзабазе. Гьебги жинцаго хъварабгIаги букIунебани… Цо лъицаялиго хъван къачIа-кIатIан бачIуна, бетIергьанчихвад.

Дов хIакимчиги цодагьаб цебегIан гIадатияв саламатав вукIарав чилъидал… Щайдай дол хисулел?  ХIакимлъун тун чан къоялдаса, сагIаталдаса, минуталдасандай дов хиса-сверун лъугьунев?

Руго хисуларелги. Цереги рукIана. Цере гIемер рукIана. Гьанже къанагIат гурони гьечIо. Амма, руго. ГIемерисел хисулаха, гьаюрай эбелалдацин лъалареб хIалалъ. Гьел хисуларел хIакимзаби наслабаз-наслабахъе кьун, халкъалъ мисалалъе рачунел хутIула ва гьез жидехъго букIараб ресаздаса пайдаги босун халкъалъе гьабураб лъикIлъи лъидаго кIочон толаро.
Амма эзул гIумру бигьаяб букIунаро. РахIатабги букIунаро. СанагIатабги букIунаро.

Гьанже ругел гIемерисел хIакимзаби руго «гIор щун букIаго цIул бахъулел», «хадув хварав хадув вукъилилан» ругел чагIи.

Гьезда гIайиб гьечIогоги батизе бегьула. ХIакимлъуде ккезегIан, гIезегIан гIадамалги ричIчIулел, гьезул проблемабиги лъалел, ракI унтун гьезие кумек гьабизейиланги къеркьолел, саламатал гIадал чагIи рукIуна гьел. Ва, гьале гури дов нилъее къваригIун вукIарав цевехъанилан лъола цо хIакимлъуда. Нилъго гIадав гIадатав чи вугила, хьулазул лъорги цIун, гIадамалги рукIуна асул кIалдире ралагьун… 

ВачIунаха… ЦIияв шоферас бачунеб цIияб машинаялда, цIияб костюмалда гъоркьан цIиял хьиталги кенчIезарун, каранчвантиниса цIиял цIоробералги рахъун, чанго тIамачги цебе ккун, ракIалдаго гьечIел, живгоги жеги хадур гъечIел, амма гIассиго «гIакъилал» рагIаби цIалула, цIияв замас хъварал. Гьа, гьанже ана ав нилъедасайилан, рукIаралго хьулалги хIорлъун, гIадамалги руссуна рокъоре.

Щай аб гьадигIан берцинго бачIине букIараб жо додин ккараб? Щайгурогоха, гьав бетIерчIахъад ккана санагIалъабазул цIураб гохIде. Гьанже дол цойгидазеги санагIалъаби гьарейилан ав лъугьани, живго гьадигIан санагIатаб бакIалдаса махIрумлъиялда хIинкъиги буго. Гьединлъидал гьас хIукму гьабула (гьале доб аслияб, яхIалъ къо хIехьолареб бакI), кIварабщинаб жо гьабизе гьаб тамахаб бакIалда гIемераб мехалъ хутIизе.

«ХIур тамахалъуб бегула хIама» - йилан кици буго магIарулазул. Ал нилъер хIакимзабиги ругоха «хIур тамахалъуб регун», кагътидаса чияр гьерсалги нилъее цIалун.

ВахI, азул «тухум» цого бугодайилан, санагIат гьечIеб суал бачIана гьанже…


___________________________


Баху МухIидинова

"Ассоциация учителей аварского языка"


← Назад к списку новостей

  
ВКонтакт Facebook Одноклассники Twitter Яндекс Livejournal Liveinternet Mail.Ru