"Яран суварин шадвилер" (новости от наших партнеров. статья на лезгинском языке)

О   рубрике   "ДАГЕСТАН"


"Яран суварин шадвилер" (новости от наших партнеров. статья на лезгинском языке)
30.03.2017

"Яран суварин шадвилер" (новости от наших партнеров. статья на лезгинском языке)

"Яран сувар" грандиозно отметили не только в Юждаге, но и за пределами Дагестана. Об этом и не только читайте подробно на нашем сайте.


Магамед Ибрагимов - гл. ред."Лезги Газет"


          **   **   **


Москва

Чи корр.


18-мартдиз къадим тарих авай Яран сувар Москвада Останкинодин концертрин “Королевский” залда къейдна. Ам “Моск­вадин лез­гияр” РНКА-ди ФЛНКА-дин такьат­рин­­ куьмекдалди тешкилна.

КIватI хьанвайбур Москвадин милли политкадин ва регионрин арада алакъа хуьнин Департаментдин регьбер Виталий Сучкова тебрикна. Гьар йисуз ихьтин сувар тешкилунай ада ФЛНКА-диз сагърай лагьана ва Яран сувар Москвадин суваррин официальный реестрдик кутунвайди къейдна.

Дагъустандин патай РФ-дин Пре­зидентдин патав гвай гьамишалугъ векил Изумруд Муь­­гьуьди­но­вади гатфарин сувар мубаракайдалай кьулухъ РД-дин Кьилин патай тебрикдин чарни кIелна. Ада дагъустанвияр патал и суварин важиблувиликай ва адет яз ам къейдзавай тегьердикай куьруь суьгьбет­на­.

Ватанэгьлияр ФЛНКА-дин ис­пол­комдин председатель Гьуьсен Шагьпазова, “Мослезги” НКА-дин советдин председатель Мадрудин Мегьамед-Эминова ва масабуру тебрикна, абур суварин кьетIенви­лерал акъвазна.

Ахпа алай аямдин лезги эстрададин гъетер тир Алияди, Н.Рагьма­новади, Диляради, М.Аликперова, “Дагъустан” дестеди, Аноради, С.Ала­гьярова, Р.Пирвердиева, Archi-M-ди, Самиради, К.Мамедовади ва масабуру зурба концерт гана.



Санкт-Петербург

Низамидин Къаинбегов


Чи уьлкведин кеферпатан меркезда 22-мартдиз Яран сувариз талукь яз дагъустанвийрин иштираквални аваз чIехи мярекатар кьиле фена. Гатфар алукьунин, тIе­би­атдал чан хтунин сувар петербургвийриз мубаракун патал мярекатдиз губернатор Георгий Полтавченкони атанвай. Ада къейд авурвал, ЮНЕСКО-дин теклифдалди международный дережадин и сувар дуьньядин меде­ниятдин ирсинин сиягьдик кутунва.

— И сувар — им чи шегьерда гьар жуьре дин­рин ва миллетрин векилар дуствилелди яшамиш хьунин, Петербургдин девлетлу ме­деният къалурунин лишан я.

Гуьгъуьнлай Г.Полтавченко  вице-губернатор Александр Говорунов, милли медениятдин автономийрин регьберрихъ галаз санал Навруз ва Яран сувар къейдзавай халкьарин медениятдиз, яшайишдиз талукь выставкайриз килигна. “Ачухнавай гъил” лишандик кваз тешкилнавай выставкада чи ватанэгьли художникар тир Арсен Къардашова, Рассо Мегьаметова, Октай Алирзаева, Шихшабег Къадиева, Саида Мусаевади ва масабуру чпин шикилар эцигнавай. Мярекат чIехи концертдалди давам хьана.



Покачи

Чи корр.


Гзаф миллетар гьуьрметлудаказ яшамиш жезвай Покачи шегьерда Ханты-Мансийский автономный округдин “Лезгияр” тешкилатдин къуватралди чи халкьдин къадим Яран сувар гурлудаказ къейдна. Шегьердин са кафеда, суварин вири лишанар эцигна, милли пар­талрин, музалатрин выставка тешкилнавай. КIватI хьанвайбур мярекатдин тамада, “Лезгияр” тешкилатдин регьбер Жалауддин Абдуразакьова тебрикна, халкьарин дуствиликай, ислягь уьмуьрдикай суьгьбетна. Ада лезгийрин и суварик урусар, татарар, башкирар ва маса халкьар мугьман хьанвайди къейдна. Мярекатда Когалымдай, Сургутдай, Лангепасдай, Мегиондай, Нижневартовскдай, Фёдоровскоедай атанвай ватандашарни авай.

Бубайрин ватандивай яргъа яшамиш жезвай дагъвияр “Дорстройсервис” ООО-дин участокдин начальник Фагьруддин Мирзаметова, муркIадин “Кристалл” дворецдин къуллугъчи Сурия Рзахановади, аскер-интернационалист, Аф­гъан­дин дяведин иштиракчи Фейруддин Гьайвазова, Покачидин мис­­­кIин­дин виликан имам Саади Омарова ва масабуру тебрикна.  Ж.Абду­раза­кьо­ва сувар тешкилиз куьмек гайибуруз чухсагъулдин чарар гана. Мярекат “Кавказ” ансамблди гурлу авуна­.
Махачкъала

Республикадин меркезда Яран  сувариз талукь яз урусрин драмтеатрдин залда чIехи концерт хьана. Зал сиве-сивди ацIанвай. Тамашачийрин гуьгьуьлар хкажун патал сегьне­дилай “Штул” дестеди, “Восток” ансамблди, кьуьлердайбурун “Молодость гор” ансамблди, лезги ва Дагъустандин эстрададин нурлу гъе­тери манияр лагьана, кьуьлерна. РД-дин халкьдин артистр Н.Шагьбазован регьбервилик кваз Да­гъус­тандин халкьдин музалатрин ан­самблди чпин устадвал къалур­на­.



Дербент

Къадим шегьердин СтIал Сулейманан тIварунихъ галай ял ядай багъда Яран сувариз талукь чIехи концерт кьиле фена. Ана халкьдин музалатрин “Дербент” ансамблди, шегьерда кардик квай театррин векилри, манидарри иштиракна.
Шегьердин администрациядин культурадин, спортдин, жегьилрин крарай политикадин ва туризмдин управленидин начальник Арсен Арухова къейдайвал, Яран сувариз ихьтин концертар тешкилун къадим шегьерда адетдиз элкъвенва.



Белиж

Къагьриман Ибрагьимов


18-мартдиз  поселокдин Г. Лезгинцеван тlварунихъ галай школадин гьаятда Яран сувариз талу­кьар­навай мярекат кьиле фена.

Шадвилерик школада кlелзавай аялри, муаллимри, аялрин диде-бубайри, машгьур манидар Нажмудин Нежведилова ва микрорайондин жемятди иштиракна.

Школадин педагог-тешкилатчи Эльвира Мегьамедовади тешкилна кьиле тухвай мярекат  ви­ри­бурун рикlел аламукьдайди хьана.

“Яран сувар” манидин ван кьилеллаз, межлис Яран цlай куь­кlуьру­налди, школадин директор Къ.Иб­рагьимова ачухна.
Суфрайрал лезги халкьдин милли хуьрекар — аш, хъчадин афарарни  пичlекар, рангар янавай какаяр, кlерецар, яр-емиш, ширинлухар ва маса няметар алай. Аялри и мярекатда лезги халкьдин адетрикай, Яран сувар кьиле тухунин къайдайрикай авур маналу суьгьбетри, гатфарин сувариз талукь яз кlе­лай шиирри, къалурай гъвечlи сегьнейри, лагьай манийри ва тамамарай кьуьлери кlватl хьанвайбурук гьевес кутуна.

Мярекат Яран цlаярилай хкадаруналди акьалтlна.



Кьасумхуьр

Хазран Кьасумов


21-март. Райондин И.Гь.Тагьирован тIва­рунихъ галай Россиядин халкьарин адетдин культурадин Центрадин вилик квай, гуьрчегдиз безетмишнавай гьаят инсанрив ацIанва. Махлукьат чи халкьдин рикI алай Яран сувар­ къейд авун па­тал кIватI хьанвайла, анал райондин кьил Нариман Абдулмуталибов,  рай­ондин администрациядин жавабдар къуллугъчияр атана акъатна, абур агьалийри еке гьуьрметдивди къаршиламишна.

Сифте гаф ра­хун патал мик­­рофондихъ райондин кьил Нариман Абдулмуталибоваз  теклифна.

— Яран сувар — им чи халкьдин къадимлувилин, чи милливилин, гатфар алукьун лишанламишзавай сувар я. Яран су­вари чи халкьдин кьисметда кье­тIен чка кьазва, — лагьана ада.

Яран ранг — ярувал, суварин кьетIенвал — цIай куькIуьрун я. Нариман Абдулмуталибова, райондин Общественный палатадин пред­седатель Алимет Мейланова, харада тунвай кIарасрик цIай кутуна.

Кьулан СтIалрин юкьван школада кардик квай аялрин кьуьлердайбурун дестеди зиринг кьуьлна ва РД-дин лайихлу артист Омар Меликова “Яран сувар”, райондин Г.Гьасанован тIварунихъ галай музшколадин аялрин хорди “Майдин сегьер­ хупI гуьзел я” манияр тамамарна.

Райондин спортдин, туризмдин ва жегьилрин крарин рекьяй коми­тетдин председатель Надыр Эфендиева спортдин милли жуьрейрай кьиле тухвай акъажунра сифтегьан­ чкаяр кьур командайривни кьилдин спортсменрив пулдин премияр ва къиметлу пишкешар вахкана. Яран суварин акъажунрин кьилин приздиз — чан алай гьерез — путар хкажунай гъалибвал  къачур Эдик Агьмедов лайихлу хьана.



Ахцегь

Дашдемир Шерифалиев


21-мартдиз райондин Культурадин кIвалин залда чи халкьдин къадим сувариз талукь гурлу межлис кьиле фена.
Райондин кьил Осман Абдулке­римов суварин кьетIенвилерал, мет­лебдал акъвазна, районэгьлийриз гатфарин сувар тебрикна ва виридалайни хъсан куьнуьчи, нехирбан, доярка лагьай тIварар къачун патал кьиле тухвай конкурсра гъалиб хьайибурув гьуьрметдин грамотаяр вахкана.

Нубатдин тебрикар авур Ахцегьрин СП-дин кавха Низам Эфендиева виридалайни хъсан ва михьи кIвал, гьаят, багъ патал конкурсра гъалиб хьайибурувни шабагьарни пишкешар вахкана.

Хуьруьн майишатдин управленидин начальник Арген Гьажиева вичи регьбервал гузвай хиле авай агалкьунрикай доклад авуна ва талукь конкурсрин гъалибчияр къейд­на.

Райондин Культурадин кIвалин къуллугъчийри Яран суварин лишанар тир тIач, гитI, иситIа, калар гьа­зур­навай ва хъсан концерт гана. И юкъуз спортдин милли жуьрейрай акъажунар кьиле фейи майдандал йифиз суварин лишан тир ялавар хъувунвай.



Кьурагь

Чи корр.


21-мартдиз райондин Спортдин дворецда волейболдай акъажунар кьиле фе­на. Спортдин ва жегьилрин крарин рекьяй отделдин начальник Рамиз Рама­занова спортсменриз ва тамашачийриз Яран сувар мубаракна. Къейд ийин хьи, районда спортдин милли жуь­рейрайни акъажунар тешкилнавай. Гъалибчияр тайин хьайидалай ­кьулухъ райондин кьил З.Азизова абурув­ пул­дин­ ва рикIел аламукьдай маса пишкешар, грамотаярни медалар вахкана. Акъажунрин сергьятра аваз  ала­дашви пагьливан, азаддиз кьуршахар кьунай пуд сеферда­ Дагъустандин кIвенкIве­чи, СКФО-дин ва международный дережада авай акъажунрин гъалибчи Рамазан Шабановни чи къаршиламишна. Нянихъ суварин иштиракчияр райцентрадин кьилин майдандал ачухнавай милли тIуь­нар­ алай столрихъ кIватI хъхьана.

Агьалийриз сувар райондин кьил Замир Азизова, ветеранрин ва агъсакъалрин райсоветдин председатель Фагьрудин Мирзоева ва маса идарайрин, тешкилатрин регьберри мубаракна.

Райондин Культурадин кIвалин ва Россиядин халкьарин адетдин культурадин цент­радин векилри хъсан концертни гана.
Мегьарамдхуьр

Яран суварин йикъан пакамалай Мегьарамдхуьре Россиядин халкьарин адетдин культурадин центрадин вилик халкьдин артистри манияр лугьузвай. Суварин шад­вилерик райондин кьил Фарид Агьмедов, Культурадин кIвалин къуллугъчияр, идарайрин векилар атана акъатна. Ф.Агьмедова суварин метлеблувиликай, бубайрин ирсиниз гьуьрмет авуникай суьгьбетна.

— Им вичин дувулар гьеле кхьинар авачир девирриз физвай къадим суваррикай я. И сувар себеб яз чав къе къадим адетар, тIуьнар агакьнава, абур чи культурадин ирсиниз элкъвенва.., —  вирибуруз къадим сувар мубарак авуналди къейдна райондин кьили.

Суварин концерт культурадин отделдин векилар тир Виолетта Рамазановади ва Насир Селимова кьиле тухвана. Чпин нумраяр гваз къунши Докъузпара райондай ва Дербент шегьердайни мугьманар атанвай. С.Саидовади, Б.Эскендерова, С.Нажафовади, Н.Саидалиевади, Р.Хидирнебиевади, Д.Къазиева ва масабуру лагьай манияр тамашачийри гурлу капар ягъуналди кьабулна. Симин пагьливанри чпин алакьунар къалурна, суварин ялавар хъувуна, маса майданрал спортдин акъажунарни  кьиле фена. Суварин мярекатрик лезгийрин милли тIуьнар дадмишдай мумкинвални авай.



Докъузпара

20-мартдиз Докъузпара райондин къадим Мискискарин хуьре Яран суварин мярекат РД-дин культурадин лайихлу работник, “Мискискар” СДК-дин директор Бренбег Абдуллаева ачухна ва кьилени тухвана. Ада агьалийриз вичин ва райондин кьил Керимхан Абасован, райсобранидин депутатрин патай сувар мубаракна. Агьалийрихъ элкъвена сувариз талукь келимаяр Мискискарин хуьруьн кьил Ш.Магьарамова, Докъузпара райондин кьилин заместитель С.Исмаилова, хуьруьн агъсакъалрини лагьана.

Райондин культурадин управленидин къуллугъчийри манияр лагьана, кьуьлерна. И юкъуз хуьре спортдин милли жуьрейрай акъажунарни тешкилнавай.

Суварин эхирдай райондин спортдин, жегьилрин крарай политикадин ва туризмдин отделдин начальник А. Агъаширинова виридаз сувар мубаракайдалай кьулухъ та­фаватлу, акъажунра гъалиб хьайибурув пулдин премиярни грамотаяр вахкана.



                * * *

Яран сувар чи халкьдин рикI алай къадим суваррикай сад я. Милливилин гьиссералди кьиле фенва и сувар лезгияр яшамиш жезвай гьар са шегьерда, гьар са районда, хуьре, магьледа. Яран сувар къейд авуналди халкьди са низ ятIани зиян гузвай, маса динар инкарзавай дуьшуьш авач кьван. Я цIузни икрамзавач. Эхь, сувар арадал атай сифте кьилерай, са гьи ятIани асирра, девирра икрам авуна жеди. Ам­ма къе цIай, рагъ, гатфар — ибур экуьвилин, чимивилин, къулайвилин, девлетдин, ислягьвилин, саламатвилин лишанриз элкъвенва. Гьавиляй михьи цава — экуь рагъ, къула — цIай, гьар йисуз берекатрин цил кутазвай гатфарни Яран хъсан йикъар хьун патал чна, Ислам диндал алайбуру, Аллагьдивай тIа­лабун, адаз икрамун герек я. Яран сувар мубаракрай, ватанэгьлияр!

← Назад к списку новостей

  
ВКонтакт Facebook Одноклассники Twitter Яндекс Livejournal Liveinternet Mail.Ru